قصيدة للشاعر الشاب... رائد ابو فتيان

من ثوب الوفه يشگ بالخيانه البيك
وغرورك صار قائد ثورة التفكير

بصريح القول ابد ما دوريت اعذار
انتهينه وأكدت ما خاني التعبير!!

اعرفك بير لكن ما اطخلك راس
اذا راضع سراب أمنين ماي ادير؟؟

ما مجبور ادنك بس اصيح بصوت
اذا يرجع صدى معناها خالي البير!!

بدون ايعاز عقلي الايد هي تروح
تگلب بالصور والحيره بيه تحير

خذتني الصورة جنت اوياك ايد بأيد
ضاجت حلت ايدك حتى بالتصوير!!

كاتلني الفراش شلون عنده اخلاق؟!
وردت طبعك تبدله ومثل طبعه تصير

ما يجرح الورة وعنها يعله اهواي
متواضع ترى الفراش ناصي يطير!!

مثل لمة فخاتي اعضاي يل طاريك
صگر وشما يمرني اعضاي تتطشر

جرح تلعب بروحي وما هديت بيوم
واضطراب بجسمي عايش تصغر وتكبر!!

حلم وردي جنيتك كلت راح ارتاح
بس طوخته حيل وصار موت احمر!!!

گطن خضر براسي وفحم شعرك صار
وضحكت الشمس من گتلي شيب اسمر؟؟!!

الفلسفة الهلا والملگه احضنك حيل
وانه اعرف بس خواصر مشتهي الخنجر

ضاع وياك تعبي وانته شخصك ضاع
وافضالي مشت مجنونه ماتذكر

لان اسم السهر مرتبط بس بالليل
الشمس ماتنام ابد لكنها ما تسهر!!!

وتگلي اگلبي ورقه وهي ورقة موت
واگلبها وترد وبروحي تتعثر

گلبت اوراق ياما وصخمتها وشوف
بعد ياورقه نگلب خلص الدفتر؟