للشاعر ميثم فالح

احلم تمرني حلم بس كون ما اصحه

والليل انحته صنم واركعله كل العمر بس لا يطل صبحه

من كتلي احبك كبل فرحة بدليلي ازرعت ميت الي اجم سنه
وما ماتت الفرحة

من الامل صفحه بقت وانكلبت الصفحه

ومن صبري باقي صرح بس الصرح من رمل

والروج اجاه جن نسر وانقض على صرحه

وجفي اللواهة الزمن شجرة وجذعهة انكسر
يا ثمر لطرحه

ومن كبل لا احشمك مرخوص لو ماتجي

من عيونك اقره الحجي ما حاجه الي اتوضحه

يالساكن بنص قصر حبك ربه ويه الفقر

واتعتني الك شوغتي واربط ابابك علك من هدمتي الملحه

كلبي اعله بابك رهم ممنون الك فهمة

وللناس كله لسن ما تتعب اتنصحه

وكله الوكت مو الك والشايلك بالصدر ولك بطل اتجرحه

ولو عاندك ما رجع غنيله طور الحزن

يتلاشه مثل الحلم بس يسمع البحه

غمضت عيني جذب ردتك تمرهة حلم

وتكيف بشوفتك ولو جاي ويه الحلم

حلمك يرد وحده جا عيني ما هدتك

وابجيلك بلا وعي غيمه ودمعهة مطر

لو شفت وركه اذبلت من ورك لبشجرتك

وصاني بيك الكلب وروحك علي وصتك
ب
درب الوصية سرت وانته بدربهة ابد متحركت خطوتك

اتكطع اثمار الشجر قوة جذب بالارض

وانته تكطع الكَلب قوة جذب نظرتك

روح الي عندي جنح وحبك سكنهة كسر ومجنونة ما ملتك

اعصر اعيوني عصر ماي الي منهة يصب بي ترسم صورتك

همك يوكع جبل امك اشلون اكدرت تسعت شهر حملتك

كوخ بجزيرة العمر واتسئله من احترك هم ناس اجت طفتك

سيفك كطع يمنتي ومن طحت ليك افزعت وبلا زند شالتك

اتمنت ترد للزند جان بمحنه ورضا فوك الصدر ضمتك

واشتعل كلي واشب ومن تكبل انته علي برد وسلم انكلب من اوكف بحضرتك

ومرخوص من اشتعل مد ايدك انته علي نار البروحي قسم اجويهة لو جوتك

وكالو البوسه ذنب صدك وحك النبي الطفل من قبلت جن قبلت وجنتك

ولاجلك الغيرة اكبرت من ايد الجلاله غرت من اصفن وفكرت وكت الخلك لزمتك

وحاذر بعد لا تمر عيوني خلصن نظر ومن تمر مره بعد يطنك الي بقه وحوبتهن بركبتك

وعمري الكضيته ركض الدرب ويه التعب من الخطوه الاولى لحد اخر خطاوي الجدم

امأمنهن بذمتك وما كول فدوه الك لوضيعتهن علي نصف فدوه يرحن الك لا يرحن النضرتك

ونص فدوه اضمهة الي خاف التقيك بدرب شكد اجمع عمر

نص فدوه اخسره الك واربح فقط شوفتك
نص فدوه اخسره الك واربح فقط شوفتك